【財政預算案民政事務總署預算睇真D】 | 葉錦龍辦事處 Office of Yip Kam Lung Sam

今日財政預算案公布，除左大家好關注既放數比失業人士但唔肯比失業救濟金、唔肯派錢但係每個月1千電子購物券送錢比支_寶等公司使等等，仲有各個部門黎緊一年可使既預算，都會喺預算案公布時同時比大家睇到。等我地透過睇下今年民政事務總署既預算，去睇睇舊年一年區議會既成績。

政府一邊同議員講，唔可以喺區議會討論全港性議題，一邊原來舊年全年已就住全港議題諮詢區議會337次，少過2019年既402次有65次。咁政府比區議會諮詢D乜內容？包括食環署綠色殯葬等等，由政府遞落黎既文件咁囉（但係就唔比議員提全港議題）。而政府預計仲會喺2021年有300次就全港議題諮詢區議會，除開18區即係一年得16個議題？

至於地區事務，舊年一個2020年，區議會已經討論左4070次，係比起2019年(即係上一屆區議會最後一年)既2801次，足足多左1269次(+45%)！證明各位議員同事喺過往一年係大幅度咁掘出左唔同既社區議題，加強積極監察政府抗疫工作，並唔係如民_聯事務局局長同埋特首所講係失效既。

至於社區參與計劃撥款(CI Funding) ，照數字睇就係大幅減少左，項目數由2019年既34474次跌落9769次(-71%)，但係受眾人次只是由1870萬跌落850萬(-54%)。反映就算因為疫情以及民政唔批錢批准D活動同研究，區議會活動的平均每活動受眾人數係升左（雖然政府就賴係區議會批准活動數量跌左）。2021年政府預算區議會批錢的活動數目會回復到32342項，同2019年相若，但參與人數仍然係2019年數字projection的1250萬人次。

議員同事們就知道今年議員酬金，政府話跟CPI調整係減左既。但睇翻經常帳，明明預算話部門減左位，但係喺部門人工開資方面，2020年卻不減反升左2243萬。相反，區議員酬金同OER實報實銷開支部份卻跌左2979萬…

簡單睇完以上預算既數字，究竟係區議會太做得野、民政署做唔到野、民政局唔識睇數字，定係政府打壓區議會肥自己呢？大家心中有數。

－葉錦龍 Yip Kam Lung Sam

中西區區議會石塘咀選區議員 Member of C&W District Council (Shek Tong Tsui)

【Whatsapp】wa.me/85256100230