郵局告示稱自2021年1月1日起，凡投寄非文件類物品到指定地區（包括大陸，英國以及其他27個歐盟國家）必須使用名為「郵件清關易」的網上平台填寫報關資料。

詳情可參考以下連結：
https://ift.tt/2XihdsC

【「清關易」欠清晰指示 】

呢個「清關易」究竟有幾易呢？近日有街坊向本辦事處反映，因新增電子報關程序，在郵局聽到數位長者埋怨掃完二維碼之後再彈出告示，需要關閉告示方能填寫資訊。長者視力不佳，往往搵到正確頁面已經花上唔少時間。弔詭的是，街坊本人嘗試自行在「郵件清關易」填寫郵寄資訊，到櫃位卻被告知郵件重量偏輕，有更經濟的郵政服務可選擇，於是又要重新填寫。職員會提供條碼用作電子報關之餘，但亦附上傳統青綠色memo狀既報關紙要求填好後交回。寄一件平郵郵包到英國，前後計埋排隊諮詢，用咗成個半鐘。

有人可能話個半鐘寄到咪算好，但街坊親見有長者因朝早排隊後發現新安排下準備不足，下晝準備妥當又要再出街排隊，受「郵寄清關易」絲毫不易既一番折磨。清關易咗幾多無人知，反而就多咗老友記因為呢個不明所以既安排白白受苦。

【要求郵政總局新增郵局人手為街坊解決電子報關疑難】

由於世界範圍武肺疫情未見好轉，郵政服務受阻，郵局業務加倍繁忙之餘營業時間縮短，亦要分出人手避免人群聚集，郵政工作者既辛苦我地應該體諒。街坊亦見到郵局工作人員百忙之中仍然幫一位長者處理咗清關遇到既問題。但特登整個咁既強制性平台，既擾民，又增加郵局工作人員負擔。本辦事處要求郵政總局檢討並改善有關安排，新增郵局人手為街坊解決電子報關既疑難。

如有相關問題或意見，可於辦公時間內致電 5610-0230 向本處職員聯絡。

#2021寄嘢去UK好似當年阿婆寄嘢去金山咁