【區議會政治化?係香港政府帶頭輸打贏要】

區議會,當佢要你宣誓時就話你好重要,當佢要褫奪你選舉權時就話你冇權力,兼且任命埋啲冇任何代表性同民意授權既東西代替你,仲要話你哋完全政治化咗變左質。

大佬,區議會最少九成時間講緊地區嘢,睇翻今年預算案,一年以黎數字上討論議題足足多上一屆接近一倍。(可參考拙文 https://www.facebook.com/817306605018029/posts/3728320240583303/) 而最新比政府話冇得傾既議題係中西區強檢同封區安排。講封區安排都政治化?梗係啦,因為香港政府根本就係政治化抗疫既始作俑者,又點會比我地用社區角度去討論抗疫,去追討街坊既豆豉鯪魚?

仲要由舊年開始大把議題無視區議會,連巴士公司加價、5B減班都唔通知、唔諮詢議會。碼頭封場,仲要連通知都冇一聲,要打電話去追問先肯講,區議會要討論但人又唔派個黎。根本就係輸打贏要。

係呀,今屆區議會好似好冇用,但係都係由政府專登帶頭做成的,因為政府帶頭聯同一眾公營機構選擇無視區議會。明明以往可以討論可以做的議題,好似政改、巴士公司政策、票站安排、警察執法等全部冇得傾,最新連區內抗疫政策都冇得傾,連舊年年頭可以用區議會預算買口罩同洗街呢一類改善地區狀況同抗疫既工作,去到今年連傾都唔比,更講到明批左錢都會閘住唔准做。仲有一堆區議會通過咗要做嘅社區研究,全部都係社區嘅歷史文化康樂健康議題,通通唔係被拖延就係被拖死。呢個政府喺另一方面卻將比由區議會派既數量多一倍以上既口罩,送比嗰啲選舉又輸嘢又做唔到又廢柴,結構組成又一啲都唔公開既所謂「Umbrella組織」。

可憐各議員同事同助理日日辛勞喺社區幫手解決社區問題,有好多問題明明係部門辦事不力都要幫你地硬食投訴,仲日日比街坊追問有冇口罩派,但係議員claim翻助理份糧卻被政府左拖右拖,最長拖接近半年先可能收得翻少少。淨係我議辦喺最高峰就試過比政府拖數接近24萬。為糧支?為糧支就唔會做呢份要帶24萬返工,以前做嘅工作又會因為寒蟬效應被消滅,又會比政權老屈又冇得出聲,仲要俾人起晒底將個人資料放晒上網投訴無門,同政府講意見又冇人聽既工啦。(實會有人話做乜唔去勞工處追討。政府成日話同區議員唔係僱傭關係,所以就算點樣爭錢都好,都根本唔係勞資糾紛囉。附圖係最嚴重嘅時候,大概係今年二月,最新仲俾政府爭緊約10萬。)

而家究竟係邊個政治化,係邊個搞亂香港?係特首定嗰班忠誠廢物?以我本人曾經返過去廣州讀書實習,之後幾年穿梭中港澳台工作,以及同各政府部門周旋既經驗,絕對唔係唔熟悉國情。但係喺而家嘅狀況,就算我話好愛我嘅香港愛我嘅國家,仲會唔會有人信?



發佈回覆

你的電郵地址並不會被公開。 必要欄位標記為 *